Menntaverkefni Aurora í Síerra Leóne
Markmiðið er að styðja Barnahjálp Sameinuðu þjóðanna, UNICEF, og stjórnvöld Síerra Leóne í því að tryggja öllum börnum á skólaaldri grunnmenntun fyrir 2015. Aurora velgerðasjóður og UNICEF á Íslandi munu vinna í sameiningu að því marki að 85% barna í Síerra Leóne njóti grunnmenntunar í skóla árið 2010.
Menntaverkefni Auroru í Síerra Leóne
Markmiðið er að styðja UNICEF og stjórnvöld Síerra Leóne í því að tryggja öllum börnum á skólaaldri grunnmenntun fyrir 2015. Stofnað var til verkefnisins árið 2008 en þá var ákveðið að Aurora velgerðasjóður og UNICEF á Íslandi myndu vinna í sameiningu að því marki að 85% barna í Síerra Leóne njóti grunnmenntunar í skóla árið 2010.
Styrktarverkefnið í Síerra Leóne er hið stærsta og umfangsmesta á vegum Auroru velgerðasjóðs til þessa. Í krafti þess hafa nú þegar á annað hundrað kennarara hlotið endurmenntun og um 60 skólabyggingar hafa risið með tilheyrandi vatnsveitu- og frárennsliskerfum, húsbúnaði og kennslugögnum. Í hverju húsi eru þrjár til sex skólastofur þar sem börnum á aldrinum 6-12 ára er kennt. Mikil áhersla var lögð á gæði námsins og að laga það sem best að þörfum barnanna og þá sérstakleg stúlkubarna. Markmiðið er að halda stúlkunum sem lengst í skóla og koma þannig í veg fyrir að þær gangi í hjónaband og hefji barneignir á æskuárum. Nærsamfélagið var einnig virkjað með því að stofna foreldrafélög við skólana og mæraklúbba.
Í júní 2011 kom út skýrsla um verkefnið fyrir tímabilið júní 2009 - júní 2011 þar sem kemur fram 9% aukning nemenda í skólum í Kono héraði og 11% aukning menntaðra kennara á svæðinu. Það kom fram að tæp 46% af þeim sem útskrifast úr grunnskólum héraðsins séu stúlkur sem er merkjanleg aukning skólasóknar stúlkna á þessu tveggja ára tímabili.
Það er því ljóst að verkefnið hefur skilað börnum á svæðinu aðgengi að menntun sem þau annars hefðu ekki átt kost á og sérstaklega stúlkum serm er í takt við markmiðin sem sett voru í upphafi. Ánægjulegt er að sjá að aukin gæði náms eru merkjanleg en ýmsar aðhalds aðgerðir voru skipulagðar til að tryggja það. Þar má taka sem dæmi aukna þátttöku nærsamfélagsins í skólastarfinu með stofnun foreldrafélaga og mæðraklúbba.
Stefán Ingi Stefánsson, framkvæmdastjóri UNICEF Ísland, segir að frá því Aurora velgerðasjóður og UNICEF hófu samstarf um menntaverkefni í einu fátækasta ríki heims, Síerra Leóne, hafi verið lyft grettistaki í menntamálum í þeim héruðum sem verkefnið nær til. „Ætla má að yfir 10.000 börn hafi fengið tækifæri til að ganga í skóla. Það er eindregið álit UNICEF að aukin menntun sé besta leiðin til að aðstoða fólk við að losna úr viðjum fátæktar. Stuðningur Auroru til þessa verkefnis er því afar mikilvægur.“
